پێشەكی

ئەم كتێبەی بەردەستت چەند وتارێكی هەڵبژێرراوی زانای موسڵمان "محمد فەتحوڵڵا گولەن"ی لەخۆگرتووە. ئەمە دووەم كتێبی لەم جۆرەیە و پێشتریش لەژێر ناونیشانی "هەناسەكانی دڵ"دا كۆمەڵە وتارێكی ترمان بڵاوكردەوە، كاتی نووسرانی ئەم وتارانە دەگەڕێتەوە بۆ سەرەتای دەرچوونی گۆڤاری (سزنتی) لە ساڵی 1979دا و ساڵانی دواتر، كە لە شێوەی سەروتاردا لەم گۆڤارەدا بڵاوبوونەتەوە. نووسەر تا ئەمڕۆش بەردەوامە لە نووسین لە گۆڤاری ناوبراودا. هەرچەندە ئەم وتارانە لە چەند كاتێكی جیا و شوێنی جیا و بارودۆخی جیادا نووسراون، بەڵام لەنێو خۆیاندا خاوەنی یەكێتی و تەواوكارین و، جیهانبینی و بۆچوونی نووسەرەكەیان دەردەخەن لەمەڕ چەندین بابەتی جۆراوجۆری مرۆیی و، جیهانی و، ئایینی و، مێتافیزیكی.

ئەم وتارانە زادەی خەمێكی قووڵ و، عەشقێكی فراوان و، دڵێكی بەسۆزن كە هەریەكەیان پاش ژان و ئازارێكی زۆر لەدایك بوون و، لە سەردەمانێكی تایبەتدا بیری نووسەر و كۆمەڵگای نووسەریان بە خۆیانەوە خەریك كردووە. هەر بۆیە چەند نووسینێكی گەرم و گوڕ و، تەڕ و پاراون و، لە هەناو و ویژدانی زانایەكی خەمخۆر و بەئەزموونەوە هاتوونەتە دەر و، ئامانجیان دۆزینەوەی چارەسەرێكە بۆ هەموو ئەو كێشە و تەنگژانەی كە وڵاتی توركیا و دنیای ئیسلامی بەتایبەتی و جیهان بەگشتی پێیانەوە گیرۆدەن. كەواتە بەلاتەوە سەیر نەبێت ئەگەر لە هەموو دێڕ و، پەرەگراف و، لاپەڕەیەكیدا دڵێكی بەجۆش و، ڕۆحێكی پڕ لە جوانی و، گیانێكی نوێ و زیندوو تیایدا نمایان بێت.

محمد فەتحوڵڵا گولەن موسڵمانێكی جیهانییە. هەروەك كوڕی كۆمەڵگەی ڕۆژهەڵات و ئیسلامە و، لە باوەشیدا گەورە بووە و، بە جوانییەكانی گۆش بووە و، بە خەم و ئازارەكانی دڵی گوشراوە، بەهەمان شێوە خاوەنی زمانێكی جیهانییە و لە نزیكەوە ئاگاداری دواین ڕووداو و پێشهاتەكانی دنیایە و، گاهـ ڕەخنە لە لایەنە خراپەكانی شارستانێتیی نوێ‌ دەگرێت و، گاهـ ڕەچەتە و چارەسەر و دەرمان پێشكەش بە زامە ماددی و مەعنەوییەكانی مرۆڤی نوێ‌ دەكات. شایانی ئاماژەیە گولەن هەڵگری هەمان جیهانبینی زانای گەورەی كورد (سەعیدی نوورسی)یە و، درێژەپێدەر و هێنەرەدی وەسێتی "كاری ئیجابی" ئەوە و، زمانێكی جیهانییە بۆ گەیاندنی پەیام و خەمەكانی ئەو. لەم ڕووەوە هیوادارین خوێنەرانی كوردزمانیش لێی بێبەش نەبن و، ئەگەر لە دەلاقەیەكی بچووكیشەوە بێت، ئاشنا ببن بە كەسایەتی هەمەڕەنگی ئەم زانایە.

محمد فەتحوڵڵا گولەن لە ساڵی 2013 دا لە لایەن گۆڤاری "تایم"ەوە بە كاریگەرترین كەسایەتی ساڵ هەڵبژێرراوە و لە جیهاندا بە پشتیوانی كردن لە ئازادی و، مافی مرۆڤ و، بەها مرۆییەكان و، دیموكراسی و، ئاشتی و، لێبوردەیی و یەكتر قبووڵ كردن و، دیالۆگی نێوان ئایین و شارستانێتییە جیاوازەكان دەناسرێت. هەروەك بە هەڵوێستە توندەكانی بەرامبەر بە هەموو جۆرەكانی تیرۆر دەناسرێتەوە و ڕاستەوخۆ لە دوای ڕووداوەكانی 11ی سێپتەمبەر، وتارێكی بەناوبانگی لە ڕۆژنامەی "نیویۆرك تایمز"ی ئەمریكیدا بڵاوكردەوە و تیایدا جەختی لەسەر ئەوە كردەوە كە نە موسڵمانی ڕاستەقینە دەكرێت تیرۆریست بێت، نە تیرۆریستیش دەكرێت موسڵمانی ڕاستەقینە بێت. لە ناوخۆی توركیا و دەرەوەیدا چەندین كتێب و لێكۆڵینەوە و نامەی ماستەر و دكتۆرا لەسەر بیر و بۆچوون و بەرهەمەكانی نووسراون. لە ژیانی شەخسی و ڕۆژانەشیدا سادەیی و، خاكی بوون و، خۆبەكەمزانین گرنگترین سیفەتیەتی. ئەمڕۆ ئەو خۆشەویست و لایەنگرانەی نووسەر كە ئیلهامیان لە ژیان و بۆچوون و جیهانبینی ئەو وەرگرتووە، بە هەر چوار لای دنیادا ، هەر لە ناوجەرگەی ئاسیاوە هەتا ئەمریكای لاتین و، هەر لە سیبیریاوە هەتا وڵاتە هەرە چەپەك و دوورە دەستەكانی ئەفریقا، هەر لە ئەوروپاوە هەتا ئاسیای ڕۆژهەڵات، بڵاوبوونەتەوە و پەیامی ئاشتی و، پێكەوەژیان و، فرەكلتوری و، بەها مرۆییەكان دەگەیەنن و، لە ڕێگەی كردنەوەی قوتابخانە و، ڕێكخراوی خێرخوازی و، سەنتەری دیالۆگەوە ڕوویەكی جوانی ئیسلام و موسڵمانان پیشان دەدەن.

خوێنەری ئازیز!

ئەم كتێبە پێكهاتووە لە چەند وتارێك كە لە نۆ كتێبی جیاوازەوە هەڵبژێرراون. ناوی كتێبەكانیش بەم شێوەیەن: چاخ و نەوە، مرۆڤ لە ناوەندی گەرداوی قەیرانەكاندا، بەرەو بەهەشتی لەدەستدراو، پارچە ئاڵتوونییەكانی كات، ڕۆژانی بەهار، فیكرە سەوزبووەكان، ئاسۆی ڕووناك، بزووتنەوەیەك كە مۆدێل و نموونەكانی لەناو خۆیدایە، هاوارەكانی بێدەنگی. وەكو لە ناونیشانی كتێبەكانەوە دەردەكەوێت، لەڕاستیدا ئەم زنجیرە كتێبە هەموویان یەك كتێبی دوور و درێژن و تیایدا هەنگاو بە هەنگاو جیهانی فیكریی نووسەر دەناسێنن.

لە كۆتاییدا هیوادارین ئەم كتێبە سوودی بۆ خوێنەرانی كوردزمان هەبێت و، لەم كڵاوڕۆژنەیەوە ئاشنایان بكات بە دنیایەكی نوێ‌ و، ببێت بە مایەی دەوڵەمەندكردنی پاشخانی فیكری و ڕۆحییان و، توێشوویەك بێت بۆ ئێمەش لە ڕێگای دوور و درێژی ئەبەدییەتدا. سەبارەت بە وەرگێڕانی ئەم كتێبەش جێی خۆیەتی دان بەوەدا بنێین كە كارەكەمان ئاسان نەبووە و، هەوڵێكی زۆرمان داوە بۆ گواستنەوەی ئەو خۆشەویستی و، جۆش و خرۆش و، شیعرییەت و، ژان و، جوانییەی كە لە هەموو یەكێكی دێڕەكانییەوە دەچۆڕێت. بەڵام هیچ كارێك بێ‌ هەڵە و كەموكورتی نییە و هیوادارین لە داهاتوودا كەسانێكی شیاو دەربپەڕنە مەیدان و مافی تەواوی خۆی پێ‌ بدەن. تۆش -ئەی خوێنەری هێژا!- بانگێشت دەكەین بۆ خوێندنەوەیەكی لەسەرخۆ و وردی ئەم كتێبە..

 

Pin It
  • Created on .
© 2024 وێب سایتى فتح لله‌ گوله‌ن.. هەموو مافەکانى پارێزراوە.
هه‌موو مافێكى ئه‌م ماڵپه‌ره‌ پارێزراوه‌. سایتى ڕه‌سمى مامۆستا فه‌تحوڵا گوله‌نه‌.